我哋做啲乜嘢?

我哋做啲乜嘢?
Avaaz 係一個聯盟, 一個結集平台,服務全世界嘅弱勢人士。
Zainab Bangura
UNON 總幹事
Avaaz呢個字,喺一啲歐洲、中東、亞洲語言裡面,係「聲音」嘅意思 — Avaaz呢個組織2007年創立,基於一個簡單嘅民主使命:組織萬國公民一齊努力,將現實世界同理想世界嘅距離縮短。

Avaaz為數以百萬唔同階層嘅人充權,令大家可以喺全球、地區、或者全國嘅重要議題上作出行動,處理貪污、貧窮、戰爭、氣候暖化等等問題。我哋採取網上組織呢個模式,令微小但成千上萬嘅個人力量,喺好短時間裏面,結集成為強大嘅群眾力量。去有關頁面參考成功例子。

Avaaz模式:我哋嘅運作方法

科技提供嘅嶄新靈活性同彈性

以前,國際公民組織同社會運動,要為針對每個議題嘅行動,分別建立支持者,一年一年、一個一個國家咁分別累積,先可以建立到有規模嘅社群,帶嚟改變。

今日,新科技令全球公民明白唔同地方嘅社會公義,其實互相依存;於是,公民組織同社會運動唔再受到過去嘅限制。但係大部分全球性嘅公民社會組織,仍然根據特定議題,建立以國家為單位嘅分會網絡,每個分會有自己嘅員工、財政預算、決策程序。Avaaz同呢啲組織唔同,我哋係一個全球性團隊,共同運作,一齊處理所有公眾關心嘅議題 – 所以我哋嘅行動享有極大靈活性同彈性,同時又可以集中力量,每次都以最大規模運作。

Avaaz嘅網上社群就好似一個超級大聲公,呼召全球公民一齊關心一啲新議題。我哋又好似一支無敵激光棒,集中公眾注意力,照亮我哋嘅目標議題。有時我哋係千千萬萬個唔會甩碌嘅救火老中青少年,遇到突然發生嘅十萬火急緊要事,會第一時間衝出嚟反應。我哋又好似幹細胞一樣,有唔等得嘅重要議題,就立即生長出最適合嘅形態,立即做嘢。

Avaaz嘅力量來自會員,處理議題同行動嘅優先次序,亦由會員決定

每年,Avaaz全體會員投票,決定優先處理邊啲議題。每星期亦會做幾個一萬會員參與嘅抽樣調查 – 會員對某啲請願反應夠好,先會將行動大規模升級。其中一啲得到大量支持,就會發俾全球所有會員,幾日、甚至幾個鐘頭之內,就會有以萬計會員參與。

以服務作為領導方法嘅組織倫理

Avaaz同事寫電郵俾會員,採取秘書向總統或者首相彙報嘅方法:我哋知你好忙,所以要用最短時間,講俾你聽最重要嘅資訊,令你可以立即決定參唔參與。而我哋行動嘅成敗,就繫於你呢個決定...

我哋非常重視你睇電郵嗰幾分鐘;所以同事嘅責任,係將全球公民嘅每人幾分鐘集合起嚟,推動世界上重要事情嘅真正改變。Avaaz同事經常同夥伴組織、專家合作,設計以會員主導嘅有效行動策略,用內容清晰又能夠打動人嘅電郵通知會員。如果會員支持,團隊就會將行動進行到底 – 包括向請願目標遞送請願信同埋會員意見、安排會員集資賣廣告,同埋其他有效嘅行動。

換言之,Avaaz同事唔會預先決定某啲議題,說服會員支持。相反,同事先聆聽會員想推動乜嘢議題,然後建議採取乜嘢行動,最有效咁爭取到世界上最多人支持。所以,好多最成功嘅Avaaz行動,都係會員主動提出。我哋服務會員一個好重要嘅部分,就係擔任好領導角色:提供視野同技巧,搵最好嘅方法執行,講俾最多人聽,一齊令世界變得更好。

集中喺議題去到臨界點,出現危同機嘅時候,作出行動

世事總會發展到一個時刻,一定要作出某個決定;而呢啲時刻,如果出現一個巨大嘅公眾聲音,就可以改變好多嘢。發展到呢一點之前,已經有人喺幕後努力咗好耐,甚至作出咗好多無私嘅貢獻;然後,臨界時刻一到,萬千公眾目光投射到呢個議題上,社會領導層究竟會作出乜嘢決定,好多時候,係視乎佢哋認為每個選項會為佢哋帶嚟嘅政治後果。呢啲既係危又係機嘅時候,就係短暫開啟嘅窗口,Avaaz社群正好作出行動,帶嚟真正嘅改變。

係一啲國家、或者一啲議題上面,呢種時機,可能每年只有一兩次。但係因為Avaaz喺任何一個國家、任何一個議題上都可以隨時行動,所以每星期都有幾次可以捉緊呢啲時機。

Avaaz由會員集資運作,保持獨立,問責清楚

由於Avaaz完全由會員集資運作。民主同問責,就係我哋嘅基礎基因;唔會有商業或者政府贊助可以令Avaaz改變行動嘅優先次序同埋考慮 – 因為我哋根本唔接受政府或商業資助。(點解值得捐錢俾Avaaz?閱讀更多資料,點擊呢度;捐錢,點擊呢度。)

化零為整,因為相同嘅價值觀走埋一齊

唔少運動、同盟,或者組織,經過一段時間,就會分裂成零散小塊 – 甚至花越嚟越多時間,想團結分裂嘅黨派。喺Avaaz呢度,我哋明白有心人走埋一齊,未必喺具體事情上一定搵到共識;所以我哋唔會強求,反而邀請大家喺每一個行動上,個人決定參唔參與。

Avaaz所有行動,都基於一套價值觀 – 深信我哋無論邊個,都首先係人;強調我哋對其他人、對下一代、未來世代,同埋對地球嘅責任。我哋針對嘅議題,都離唔開呢個原則,所以我哋一次又一次咁發現:因為關心某個議題而參與我哋社群嘅新朋友,都會關心同埋支持我哋社群提出嘅其他議題,呢個現象俾我哋好大希望:原來我哋抱有同一個夢想,可以一齊努力,由現實世界建築同一條橋,達到我哋共同嘅理想世界。